கோவை போலீஸின் மாஸ் ரிப்போர்ட் 2025: குற்றங்கள் சரிவு, பறிமுதலில் அதிரடி - பாதுகாப்பான கோவையை உறுதி செய்யும் வருடாந்திர புள்ளிவிவரம்!

கோவை மாவட்ட காவல்துறையின் 2025-ஆம் ஆண்டிற்கான வருடாந்திர செயல்பாடுகள் குறித்த விவரங்கள் வெளியாகியுள்ளன. அதன்படி, இந்த ஆண்டில் பதிவு செய்யப்பட்ட 49 கொலை வழக்குகளிலும் சம்பந்தப்பட்ட அனைத்து குற்றவாளிகளும் கைது செய்யப்பட்டுள்ளனர். ரவுடியிசம், பழிவாங்கல் அல்லது அரசியல் காரணங்களால் எந்தக் கொலைகளும் நடைபெறவில்லை என்பது குறிப்பிடத்தக்கது. தீவிர ரோந்துப் பணிகள் காரணமாக காயம் தொடர்பான வழக்குகள் 12% குறைந்துள்ளன. மேலும், பெண்களுக்கு எதிரான குற்றங்கள் 15 சதவீதமும், போக்சோ வழக்குகள் 10 சதவீதமும் குறைந்து, கோவை மாவட்டத்தின் பாதுகாப்பு நிலையை மேம்படுத்தியுள்ளன.

சொத்துக் குற்றங்களைத் தடுப்பதில் கோவை போலீஸார் காட்டிய தீவிரத்தால், 572 வழக்குகளில் ரூ.2.33 கோடிக்கும் அதிகமான மதிப்புள்ள தங்கம் மற்றும் வாகனங்கள் மீட்கப்பட்டு உரியவர்களிடம் ஒப்படைக்கப்பட்டுள்ளன. போதைப்பொருள் ஒழிப்பு நடவடிக்கைகளில் கடந்த ஆண்டை விட 52% அதிகமாக 670 கிலோ கஞ்சா மற்றும் சிந்தெடிக் மருந்துகள் பறிமுதல் செய்யப்பட்டுள்ளன. மேலும், சட்டவிரோத லாட்டரி விற்பனை மற்றும் புகையிலைப் பொருட்கள் விற்பனைக்கு எதிராக மேற்கொள்ளப்பட்ட சோதனைகளில் நூற்றுக்கணக்கானோர் கைது செய்யப்பட்டுள்ளதுடன் 167 கடைகள் சீல் வைக்கப்பட்டுள்ளன. சாலைப் பாதுகாப்பைப் பொறுத்தவரை, காவல்துறையின் நடவடிக்கைகளால் உயிரிழப்பு ஏற்படும் விபத்துகள் 22% குறைந்துள்ளன.

நவீன தொழில்நுட்பங்களைப் பயன்படுத்துவதில் கோவை காவல்துறை முன்னோடியாகத் திகழ்கிறது. "Khaki Beats" என்ற 24/7 ஜிபிஎஸ் வசதி கொண்ட 35 இருசக்கர வாகன ரோந்து சேவை இந்த ஆண்டு தொடங்கப்பட்டது. சைபர் குற்றங்களில் பாதிக்கப்பட்டவர்களுக்கு ரூ.1.56 கோடி பணம் மீட்டுத் தரப்பட்டுள்ளதுடன், டிஜிட்டல் கைது மோசடியில் ஈடுபட்டவருக்கு 55 நாட்களுக்குள் 6 ஆண்டு சிறை தண்டனை பெற்றுத் தந்து அதிரடி காட்டியுள்ளனர். நிர்வாக மேம்பாட்டிற்காக நீலம்பூர் புதிய காவல் நிலையம் உருவாக்கப்பட்டதுடன், பொள்ளாச்சி கிழக்கு உட்பட ஐந்து காவல் நிலையங்கள் ஐஎஸ்ஓ தரச்சான்றிதழ் பெற்றுச் சாதனை படைத்துள்ளன.