news link

கியா இந்தியாவின் அங்கீகரிக்கப்பட்ட டீலரான பிரசன்னா கியா, கோயம்புத்தூர் மெர்லிஸ் ஹோட்டலில் புதிய கியா சோரென்டோவை அறிமுகப்படுத்தியது.

இந்த நிகழ்வில் மாண்புமிகு அமைச்சர் வி. சம்பத் குமார், சிங்காநல்லூர் தொகுதியின் மாண்புமிகு சட்டமன்ற உறுப்பினர் கே.எஸ். ஸ்ரீ கிரி பிரசாத், கியா இந்தியாவின் மண்டல விற்பனை மேலாளர் திரு. கௌரவ் குமார், பிரசன்னா குழுமத்தின் நிர்வாக இயக்குநர் திரு. செந்தில் குமார் மற்றும் பிரசன்னா குழுமத்தின் இணை நிர்வாக இயக்குநர் திரு. அனிஷ் பிரசன்னா ஆகியோர் முன்னிலையில் நடைபெற்றது.

இந்தியாவில் கியாவின் முதல் ஹைப்ரிட் மாடலாக அறிமுகமாகியுள்ள சோரென்டோ, ரூ.27.99 லட்சம் முதல் கிடைக்கிறது. பிரீமியம் வடிவமைப்பு, ஹைப்ரிட் தொழில்நுட்பம், மேம்பட்ட பாதுகாப்பு அம்சங்கள் மற்றும் நவீன வசதிகளை ஒருங்கிணைத்து, சோரென்டோ புதிய தலைமுறை வாடிக்கையாளர்களுக்கான சிறப்பான ஓட்டுநர் அனுபவத்தை வழங்குகிறது. இதில் Smartstream 1.6 Turbo GDI Hybrid பவர்டிரெயின், 12.3-இன்ச் HD டிஸ்ப்ளேக்கள், பனோரமிக் சன்ரூஃப், வென்டிலேட்டட் மற்றும் ரிலாக்சேஷன் சீட்கள், Bose பிரீமியம் சவுண்ட் சிஸ்டம், Kia Connect 2.0 மற்றும் மேம்பட்ட ஓட்டுநர் உதவி அம்சங்கள் உள்ளிட்டவை இடம்பெற்றுள்ளன.

இந்த நிகழ்வில் பேசிய பிரசன்னா குழுமத்தின் இணை நிர்வாக இயக்குநர் திரு. அனிஷ் பிரசன்னா கூறுகையில், “புதிய கியா சோரென்டோவை எங்கள் வாடிக்கையாளர்களிடம் கொண்டு வருவதில் நான் மிகுந்த மகிழ்ச்சியடைகிறேன். இந்த அறிமுகம் பிரசன்னா கியாவிற்கு ஒரு பெருமைமிக்க மைல்கல்லாகும். மேலும், கியாவின் புதிய மற்றும் மேம்பட்ட தயாரிப்புகளை வாடிக்கையாளர்களுக்கு நெருக்கமாக கொண்டு சேர்ப்பதில் எங்களது தொடர்ச்சியான முயற்சியின் முக்கியமான ஒரு பகுதியாக இந்த அறிமுகம் அமைந்துள்ளது. எங்கள் ஷோரூம்களுக்கு வருகை தந்து சோரென்டோவை நேரடியாக அனுபவிக்கவும், அதன் ஹைப்ரிட் தொழில்நுட்பம், பிரீமியம் வசதி மற்றும் மேம்பட்ட அம்சங்களை அறிந்துகொள்ளவும், மேலும் இயக்கத்தின் இந்த உற்சாகமான புதிய அத்தியாயத்தில் ஒரு பகுதியாக இருக்கவும் வாடிக்கையாளர்களை நான் அழைக்கிறேன், என்றார்.கோயம்புத்தூர், ஈரோடு, திருப்பூர், பொள்ளாச்சி, கரூர், நாமக்கல் மற்றும் ஊட்டி உள்ளிட்ட பகுதிகளில் உள்ள பிரசன்னா கியா ஷோரூம்களிலும் கியா சோரென்டோ வாடிக்கையாளர்களுக்கு கிடைக்க ஏற்பாடுகள் செய்யப்பட்டுள்ளன.இதன் மூலம் கொங்கு மண்டலத்தின் பல்வேறு பகுதிகளில் பிரீமியம் கியா வாகன அனுபவத்தை வழங்குவதற்கான தனது உறுதிப்பாட்டை பிரசன்னா கியா மேலும் வலுப்படுத்துகிறது.

நாட்டின் 80-வது சுதந்திர தினத்தை முன்னிட்டு, எதிர்கால சந்ததியினரின் நலனைக் காக்கும் பொருட்டு கோவையில் "போதை இல்லா தமிழ்நாடு" என்ற லட்சியத்தை நோக்கமாகக் கொண்டு பெற்றோர்களை ஒருங்கிணைக்கும் விழிப்புணர்வு இயக்கம் இன்று காலை மதுக்கரையில் நடைபெற்றது. "என்றும் உண்மை வெற்றி, உணவை வீணாக்காதீர்" அமைப்பின் நிறுவனர் மற்றும் புகைப்படக் கலைஞர் M. ஜான் அவர்களின் தலைமையில் இந்நிகழ்வுக்கான ஏற்பாடுகள் மிகச் சிறப்பாகச் செய்தார். போதைப் பொருள் இல்லாத ஒரு புதிய சமுதாயத்தை உருவாக்கவும், பிள்ளைகளின் எதிர்காலத்தைப் பாதுகாக்கவும் போதைக்கு எதிரான விழிப்புணர்வை வீட்டிலிருந்தே தொடங்குமாறு பெற்றோர்களுக்கு இந்நிகழ்ச்சியில் வலுவான அழைப்பு விடுக்கப்பட்டது.

கோவை, மதுக்கரை குவாரி ஆபீஸ் பஸ் ஸ்டாப் அருகில் இன்று காலை நடைபெற்ற இந்த விழிப்புணர்வு நிகழ்ச்சியில் பொதுமக்கள் மற்றும் பெற்றோர்கள் பெருமளவில் கலந்துகொண்டு போதைக்கு எதிரான உறுதிமொழியை ஏற்றுக்கொண்டனர். "போதை இல்லா தமிழகத்தை உருவாக்குவது நம் அனைவரின் கனவு மற்றும் கடமை" என்ற எழுச்சி முழக்கத்துடன் நடைபெற்ற இந்நிகழ்ச்சியைச் சிறப்பாக முன்னெடுத்து நடத்திய அனைவருக்கும் மாணவ-மாணவியர் சார்பாக மனமார்ந்த நன்றிகள் தெரிவிக்கப்பட்டது.

கோவையில் இன்று தீத்திபாளையம் ஊராட்சியில் தமிழக வெற்றிக் கழக நிர்வாகிகள் ஒன்றிணைந்து 80 ஆவது சுதந்திர தின விழாவை முன்னிட்டு தேசியக்கொடி ஏற்றி மரியாதை செய்து மற்றும் பொதுமக்களுக்கு இனிப்புகளை வழங்கி மிகச் சிறப்பாக கொண்டாடினர், மேலும் தீத்திபாளையம் ஊராட்சியில் நடைபெற்ற கிராம சபை கூட்டத்தில் தமிழக வெற்றிக் கழக தீத்திபாளையம் ஊராட்சி நிர்வாகிகள் கலந்து கொண்டு பொதுமக்கள் சார்பாக பல்வேறு கோரிக்கைகளை முன் வைத்தனர்.

ஸ்ரீ ராமகிருஷ்ணா மகளிர் கலை அறிவியல் கல்லூரியில் 32ஆவது பட்டமளிப்பு விழா நடைபெற்றது. கேபிஎம்ஜி இந்தியா நிறுவனத்தின் கல்வி மற்றும் திறன் மேம்பாட்டுச் சேவைப் பிரிவின் தேசியத்தலைவர் திரு.நாராயணன் ராமசாமி அவர்கள் சிறப்பு விருந்தினராகக் கலந்து கொண்டு பேசும்போது, மாணவிகள் தொழில்நுட்ப வளர்ச்சிக்கு ஏற்ப புதிய திறன்களைத் தொடர்ந்து கற்றுக்கொண்டு, மாற்றங்களை ஏற்றுக்கொள்ளும் மனப்பான்மையுடன் செயல்பட வேண்டும். தன்னம்பிக்கை, கடின உழைப்பு மற்றும் நேர்மை ஆகியவற்றை வாழ்க்கையின் அடிப்படையாகக் கொண்டு எதிர்காலத்தில் சிறந்த சாதனைகளை படைக்க வேண்டும் என்று கூறினார்.

எஸ்.என்.ஆர் சன்ஸ் அறக்கட்டளையின் நிர்வாக அறங்காவலர் முனைவர் திரு.சுந்தர் ராமகிருஷ்ணன் அவர்கள் நிகழ்ச்சிக்குத் தலைமை தாங்கிப் பேசும்போது, கல்வி என்பது நமக்கு மட்டுமல்லாமல் பிறருக்கும் பயன் தருவது தொடர் உழைப்பின் பலனாகப் பட்டம் பெறும் மாணவிகள், தங்களுடைய திறமைகளைத் தனக்கும் தான் வாழும் சமூகத்திற்கும் உதவக்கூடியதாகப் பயன்படுத்த வேண்டும் என்று கூறிய அவர், மாணவிகளின் வாழ்க்கையில் வெற்றிகளையும் பலவித முன்னேற்றங்களையும் பெற வாழ்த்தினார்.

முதல்வர் முனைவர் கி.சித்ரா அவர்கள் கல்லூரி மற்றும் மாணவிகளின் சாதனைகளையும் பல்கலைக்கழக அளவில் அவர்கள் பெற்ற சிறப்புகளையும் குறிப்பிட்டுப் பட்டம் பெற்ற அனைவரையும் பாராட்டிப் பேசினார். 4 தங்கப்பதக்கங்கள் உட்பட பல்கலைக்கழக அளவில் 12 சிறப்பிடங்களைக் கல்லூரி மாணவிகள் பெற்றுள்ளதோடு, இளநிலை மற்றும் முதுநிலைப் பிரிவுகளில் 634 பேர் பட்டம் பெற்றுள்ளனர் என்பது குறிப்பிடத்தக்கது. நிகழ்ச்சியில் எஸ்.என்.ஆர் சன்ஸ் அறக்கட்டளையின் முதன்மை செயல் அலுவலரும் கல்லூரியின் செயலருமான திரு.சி.வி.ராம்குமார் மற்றும் எஸ்.என்.ஆர் சன்ஸ் அறக்கட்டளையின் தலைமை நிர்வாக அதிகாரி திரு,டி.மகேஷ்குமார் ஆகியோர் கலந்து கொண்டனர்.

உடுமலைப்பேட்டை அரசு பள்ளி ஓவியர் ஆசிரியர் மதன்குமார், காந்திமுத்து சாமிநாதன், திருகுமரன் ஆகியோர் இணைந்து மாற்றுத்திறன் கொண்ட 50 நபர்களுக்கு இன்று அரிசி மற்றும் மதிய உணவு வழங்கினர். இந்நிகழ்ச்சிக்கான ஏற்பாடுகளை சுந்தராபுரம் மணிகண்டன், சாந்தி, தினகரன்சாமுவேல் ஆகியோர் செய்திருந்தனர்.

இந்நிகழ்ச்சியில் வருகை தந்த ஆசிரியர் மதன்குமார் அவர்களுக்கு 

'உண்மை வெற்றி 

உணவை வீணாக்காதீர்கள்' அமைப்பின் நிறுவனர் மற்றும் புகைப்படக் கலைஞர் ஜான்  

மதன்குமார் அவர்களுக்கு பொன்னாடை போர்த்தி கவுரவித்தார். காந்திமுத்து அவர்களுக்கு மணிகண்டன் பொன்னாடை போர்த்தி கௌரவித்தார் மாற்றுத்திறனாளிகள் கலந்துகொண்டு நலத்திட்டங்களைப் பெற்றுக்கொண்டு தங்களது மகிழ்ச்சியைத் தெரிவித்தனர்.

கோவை ஸ்டேன்ஸ் பள்ளி' (Stanes ICSE/ISC School) சார்பில், இந்திய பள்ளி சான்றிதழ் தேர்வுகளுக்கான கவுன்சில் (CISCE) மண்டல அளவிலான தடகளப் போட்டிகள் கோவை நேரு மைதானத்தில் இன்று கோலாகலமாகத் தொடங்கின.

நடைபெறவுள்ள இப்போட்டிகளில் தமிழ்நாடு, புதுச்சேரி மற்றும் அந்தமான் நிக்கோபார் தீவுகளைச் சேர்ந்த ஏ, பி, சி மற்றும் டி (Zones A, B, C & D) ஆகிய மண்டலங்களிலிருந்து சுமார் 700-க்கும் மேற்பட்ட மாணவ, மாணவிகள் ஆர்வத்துடன் பங்கேற்றுத் தங்களது விளையாட்டுத் திறமைகளை வெளிப்படுத்தி வருகின்றனர். நிகழ்ச்சியில்

2024-ஆம் ஆண்டு நடைபெற்ற 70 வயதிற்கு மேற்பட்டோருக்கான உலகக் கோப்பை கிரிக்கெட் போட்டியில் இந்தியாவைப் பிரதிநிதித்துவப்படுத்திய டாக்டர் ஜெயக்குமார் ஸ்டானியட், நிர்வாகக் குழு உறுப்பினர் டாக்டர் சுசீதா ராமச்சந்திரன் ஆகியோர் முதன்மை விருந்தினர்களாகப் பங்கேற்றனர்.

மேலும், ஸ்டேன்ஸ் ICSE பள்ளி முதல்வர் ஜெனட் ஜெயபிரகாஷ், ஸ்டேன்ஸ் ஏஜ மேல்நிலைப் பள்ளி முதல்வர் P.A. ஜான் ஸ்டீபன், ஸ்டேன்ஸ் CBSE பள்ளி முதல்வர் எலின் ஜெத்ரோ மற்றும் ஸ்டேன்ஸ் சர்வதேசப் பள்ளி முதல்வர் ஜார்ஜினா சிம்மன்ஸ் ஆகியோர் நிகழ்வில் கலந்துகொண்டு வீரர்களை உற்சாகப்படுத்தினர்.இளம் விளையாட்டு வீரர்களின் திறமைகளை வெளிக்கொண்டு வந்து, மண்டல அளவில் சாதனைகள் படைக்க இப்போட்டி ஒரு சிறந்த தளமாக அமையும். ஆகஸ்ட் 10 மற்றும் 11 ஆகிய இரு தினங்கள் நடைபெறும் இத்தடகளப் போட்டிகள் நாளை மாலை நிறைவடைகின்றன.

ஆர்.எஸ்.அஞ்சனா குரூப்ஸ் மற்றும் தி ஐ ஃபவுண்டேஷன் கண் மருத்துவமனை இணைந்து கோயம்புத்தூர், குளத்து பாளையம், கோகுலம் காலனி, சாஷா ஸ்கூல் ஆப் லைப் என்ற இடத்தில் பொதுமக்களுக்கான இலவச கண் புரை அறுவை சிகிச்சை முகாமை நடத்தியது.இந்த முகாம் காலை முதல் மதியம் வரை நடைபெற்றது.இந்த முகாமினை ஆர்.எஸ்.அஞ்சனா குரூப்ஸ் நிர்வாக இயக்குனர் M. ராஜேஷ் குமார் மற்றும் கோவை N. குருசாமி ஆகியோர் துவக்கி வைத்தனர்.

சாஷா ஸ்கூல் ஆப் லைஃப் (SASHA School for Life) பள்ளியின் செயலாளர் திரு. சசிகுமார் சாம்ராஜ் (Mr. Sasikumar Samraj), தாளாளர் திருமதி. ஹேமலதா சசிகுமார் (Mrs. Hemalata Sashikumar) மற்றும் முதல்வர் திருமதி. பவித்ரா (Mrs. Pavithra) ஆகியோர் 

உணவை வீணாக்காதீர்கள்' அமைப்பின் நிறுவனர் மற்றும் புகைப்படக் கலைஞர் ஜான் நிகழ்ச்சியில் கலந்து கொண்டனர்.

இந்த முகாமில், கண் புரை உள்ளவர்களுக்கு கோவை தி ஐ ஃபவுண்டேஷன் கண் மருத்துவமனையின் தொண்டு நிறுவனமான ராஜலக்ஷ்மி நேத்ராலாயாவில் இலவசமாக IOL லென்ஸுடன் கூடிய கண் புரை அறுவை சிகிச்சை வழங்கப்படவுள்ளதுடன், உணவு, மருந்து மற்றும் தங்கும் வசதியும் இலவசமாக அளிக்கப்படும்.

மேலும், அறுவை சிகிச்சை செய்ய விரும்புபவர்கள் ஆதார் அட்டை, வாக்காளர் அடையாள அட்டை, ஓட்டுநர் உரிமம் அல்லது குடும்ப அட்டை ஆகியவற்றில் ஏதேனும் ஒன்றின் நகலை தவறாமல் கொண்டுவரம் அறிவுறுத்தப்பட்டது. மேலும் கருவிழி மாற்று அறுவை சிகிச்சை, விட்ரக்டோமி அறுவை சிகிச்சை, குழந்தைகளுக்கான கண் அறுவை சிகிச்சை, விழித்திரை விலகல் அறுவை சிகிச்சை மற்றும் விழித்திரை நோய்க்கான அறுவை சிகிச்சை போன்ற கண் சிகிச்சைகளும் தகுதியுடையவர்களுக்கு இலவசமாக சிகிச்சை வழங்கப்படுவது குறிப்பிடத்தக்கது.

கோவை கே.பி.ஆர். பொறியியல் கல்லூரியின் பிசினஸ் ஸ்கூல் சார்பில், முதலாம் ஆண்டு MBA மாணவர்களுக்கான ‘அப்யுதயா ’26’ அறிமுக நிகழ்ச்சி இன்று நடைபெற்றது. இதில் பேசிய கல்லூரிச் செயலாளர் காயத்ரி ஆனந்தகிருஷ்ணன், செயற்கை நுண்ணறிவு யுகத்திலும் தனித்திறன் மற்றும் மனிதநேயப் பண்புகளே மிக முக்கியம் என்று வலியுறுத்தினார். கல்லூரி முதல்வர் முனைவர் அகிலா மற்றும் சிறப்பு விருந்தினர்கள் கே.டி. சீனிவாச ராஜா, பேராசிரியர் வி. பழனிமுத்து ஆகியோர், மாணவர்கள் வேலை தேடுபவர்களாக மட்டுமின்றி வேலைவாய்ப்பை உருவாக்குபவர்களாக மாற வேண்டும் என அறிவுறுத்தினர். வரும் நாட்களில் துறை வல்லுநர்களின் வழிகாட்டுதல் அமர்வுகள் தொடர்ந்து நடைபெற உள்ளன.

கோவை கே.பி.ஆர். பொறியியல் மற்றும் தொழில்நுட்பக் கல்லூரியின் கே.பி.ஆர். பிசினஸ் ஸ்கூல் சார்பில், முதலாம் ஆண்டு முதுநிலை வணிக நிர்வாக (எம்.பி.ஏ.) மாணவர்களுக்கான ‘அப்யுதயா ’26’ அறிமுகம் மற்றும் வழிகாட்டுதல் நிகழ்ச்சி இன்று தொடங்கியது. இதில் மாணவர்களுடன் அவர்களது பெற்றோர்களும் கலந்துகொண்டனர்.நிகழ்ச்சிக்கு கே.பி.ஆர். கல்வி நிறுவனங்களின் செயலாளர் காயத்ரி ஆனந்தகிருஷ்ணன் தலைமை வகித்து, மாணவர்கள் மற்றும் பெற்றோர்களை வரவேற்று வாழ்த்துரை வழங்கினார். அப்போது அவர், “செயற்கை நுண்ணறிவு இன்று அனைத்து துறைகளிலும் பெரும் மாற்றத்தை ஏற்படுத்தியுள்ளது. தகவல்களை எளிதாகவும் விரைவாகவும் பெறும் வசதியை அது உருவாக்கியுள்ளது. எனவே, மாணவர்கள் செயற்கை நுண்ணறிவுடன் போட்டியிடுவதற்குப் பதிலாக, அதனால் செய்ய முடியாத தனித்திறன்கள், சிந்தனைத் திறன் மற்றும் மனிதநேயப் பண்புகளை வளர்த்துக் கொள்ள வேண்டும். குறிப்பாக, ஒழுக்கம் என்பது செயற்கை நுண்ணறிவால் வழங்க முடியாத முக்கியமான மனிதப் பண்பாகும்,” என்றார்.

அதனைத் தொடர்ந்து கல்லூரியின் முதல்வர் முனைவர் அகிலா முத்துராமலிங்கம் பேசுகையில், கே.பி.ஆர். மில் நிறுவனத்தின் ரூ.42 ஆயிரம் கோடி மதிப்பிலான வளர்ச்சியை மாணவர்கள் சிறந்த முன்னுதாரணமாக எடுத்துக்கொள்ள வேண்டும் என்றார். முதுநிலை மாணவர்களுக்கான ‘ஸ்ட்ரைடு’ திட்டம், திறன் மேம்பாடு மற்றும் சிறந்த வேலைவாய்ப்புக்கு வழிவகுக்கும் என தெரிவித்தார். தொடர்ந்து துறைத் தலைவர்களை அறிமுகப்படுத்தினார்.துவக்க நாளில், சிறப்பு விருந்தினராக பங்கேற்ற அடையார் ஆனந்த பவன் நிர்வாக இயக்குநர் கே.டி. சீனிவாச ராஜா, நேர மேலாண்மை, மன உறுதி, இலக்கு நிர்ணயம், மதிப்புக் கூட்டுதல் மற்றும் தொழில்முனைவோர் சிந்தனையின் அவசியம் குறித்து பேசினார். மாணவர்கள் வேலை தேடுபவர்களாக மட்டுமின்றி, வேலைவாய்ப்புகளை உருவாக்குபவர்களாகவும் வளர வேண்டும் என அறிவுறுத்தினார்.

தஞ்சாவூர் தேசிய உணவுத் தொழில்நுட்பம், தொழில்முனைவு மற்றும் மேலாண்மை நிறுவன இயக்குநர் பேராசிரியர் வி. பழனிமுத்து, ‘புதுமை தவிர்க்க முடியாதது’ என்ற தலைப்பில் பேசினார். மாணவர்களின் முழுமையான ஆளுமை வளர்ச்சி, நல்ல அணுகுமுறை, தனிநபர் உறவுத்திறன், ஆராய்ச்சி வெளியீடுகள் மற்றும் இன்குபேஷன் வாய்ப்புகளின் முக்கியத்துவத்தை எடுத்துரைத்தார்.

நிகழ்ச்சியில் கலந்து கொண்ட பெற்றோர்களுக்கும், மாணவர்களின் கல்விப் பயணம், மேலாண்மைத் திறன் வளர்ச்சி மற்றும் எதிர்கால தொழில் வாய்ப்புகள் தொடர்பான தகவல்கள் பகிரப்பட்டன.

தொடர்ந்து அடுத்த நான்கு நாட்களிலும், தொழில் மற்றும் மேலாண்மைத் துறைகளைச் சேர்ந்த வல்லுநர்கள் பங்கேற்று தனிநபர் பிராண்டிங், பிராண்ட் மேலாண்மை, நிதி நிலைத்தன்மை, தொழில்முனைவோர் சிந்தனை உள்ளிட்ட பல்வேறு தலைப்புகளில் மாணவர்களுக்கு வழிகாட்ட உள்ளனர்.

ஆன்மீக உணர்வை மேம்படுத்தவும், பக்தி மற்றும் சமூக ஒற்றுமையை வலுப்படுத்தவும், ஜெகன்நாத் டெக்ஸ்டைல்ஸ் & பிராப்பர்ட்டீஸ் வழங்கும், பரமசிவனுக்கு அர்ப்பணிக்கப்பட்ட மிகப் புனிதமான வேத யாகங்களில் ஒன்றான மகா ருத்ர அபிஷேக விழா மற்றும் ஒரு லட்சம் ருத்ர பாராயணம் கோயம்புத்தூர், ஆர்.எஸ்.புரம், டி.பி.ரோட்டில் அமைந்துள்ள ராஜஸ்தானி சங்க வளாகத்தில் பிரம்மாண்டமாக நடைபெற்றது.இந்த மாபெரும் ஆன்மீக நிகழ்ச்சி 20-ம் வருடமாக நடைபெறுவது குறிப்பிடத்தக்கது.

இந்நிகழ்வின் மூலம் உலக அமைதி, வளமான வாழ்க்கை, ஆரோக்கியம் மற்றும் அனைவரின் நலனுக்காக இறைவனிடம் பிரார்த்தனை செய்யும் வாய்ப்பு பக்தர்களுக்கு ஏற்படுத்தப்பட்டுள்ளது.கோயம்புத்தூர் மற்றும் சுற்றுவட்டார மாவட்டங்களைச் சேர்ந்த ஏராளமான பக்தர்கள் இந்நிகழ்வில் பங்கேற்று உள்ளனர்.இந்நிகழ்ச்சி, மதியம் 12.00 மணி முதல் பக்தர்கள் தாங்களே கலந்து கொண்டு அபிஷேகம் செய்யும் நிகழ்வுடன் தொடக்கியது. தொடர்ந்து மாலை 5.00 மணிக்கு மகா ருத்ர அபிஷேகம், மாலை 6.30 மணிக்கு மகா அலங்காரம், பின்னர் மாலை 7.00 மணிக்கு மகா தீபாராதனை நடைபெற்று, அதனைத் தொடர்ந்து அனைத்து பக்தர்களுக்கும் மகா பிரசாதம் வழங்கப்பட்டது.

மகா ருத்ராபிஷேக விழாவில், சிவபெருமானுக்கு பல்வேறு அபிஷேகப் பொருட்களைக் கொண்டு சிறப்பு அபிஷேகங்கள் நடைபெற்றது.1008 லிட்டர் பசும்பால், 1008 தாமரைப் பூக்கள், 306 லிட்டர் தயிர், 108 இளநீர், 108 லிட்டர் கரும்புச் சாறு, 108 லிட்டர் பஞ்சாமிர்தம், 108 லிட்டர் பன்னீர், 108 லிட்டர் திருமஞ்சனம், 108 லிட்டர் சந்தனம், 108 லிட்டர் பழரசம், 108 கிலோ விபூதி, 18 கிலோ கரும்புச் சர்க்கரை, 18 கிலோ அரிசி மாவு, 18 லிட்டர் தேன் மற்றும் 18 லிட்டர் நெய் உள்ளிட்ட புனித திரவியங்களால் அபிஷேகம் நடைபெற்றது. மேலும், மற்றும் அனைத்து இந்து நதிகளிலிருந்தும் கொண்டு வரப்பட்ட புனித நீர்களைக் கொண்டு சிறப்பு அபிஷேகங்களும் நடைபெற்றது.

மகா ருத்ர அபிஷேகம் என்பது வேத மரபில் மிகவும் சக்தி வாய்ந்த சிவ வழிபாடாகக் கருதப்படுகிறது. ஸ்ரீ ருத்ரம் மற்றும் வேத மந்திரங்கள் முழங்க நடைபெறும் இந்த அபிஷேகம், பக்தர்களின் வாழ்க்கையில் உள்ள தடைகளை நீக்கி, மன அமைதி, ஆரோக்கியம், ஆன்மீக முன்னேற்றம் மற்றும் இறையருளைப் பெற்றுத் தரும் என்பது ஐதீகம். இந்நிகழ்வின் மூலம் இளம் தலைமுறையினரிடையே ஆன்மீக பாரம்பரியத்தை வளர்த்தெடுப்பதோடு, இந்தியாவின் தொன்மையான வேத கலாச்சாரத்தையும் பாரம்பரிய வழிபாட்டு முறைகளையும் அனைவரிடமும் கொண்டு சேர்ப்பதே முக்கிய நோக்கமாகும் என ஏற்பாட்டாளர்கள் தெரிவித்துள்ளனர்.

ஜெகன்நாத் டெக்ஸ்டைல்ஸ் & பிராப்பர்ட்டீஸ் நிறுவனங்களின் பிரதிநிதிகள் கூறுகையில், இந்த புனித நிகழ்வை இணைந்து நடத்துவதில் பெரும் மகிழ்ச்சி அடைகிறோம். இந்த விழா சிறப்பாக நடைபெற உறுதுணையாக இருக்கும் வேத விற்பன்னர்கள், தன்னார்வலர்கள் மற்றும் ஆதரவளித்து வரும் அனைவருக்கும் எங்களது மனமார்ந்த நன்றியைத் தெரிவித்துக் கொள்கிறோம். பக்தர்கள் சிரமமின்றி தரிசனம் செய்து வழிபட தேவையான அனைத்து ஏற்பாடுகளும் செய்யப்பட்டுள்ளனஎன்றனர்.இந்த ஆன்மீக விழாவில் குடும்பத்தினருடனும் நண்பர்களுடனும் கலந்து கொண்டு இறைவன் சிவபெருமான் மற்றும் அன்னை பார்வதி தேவியின் அருளைப் பெற்று அனைத்து பக்தர்களையும் ஏற்பாட்டாளர்கள் அன்புடன் அனுசரித்தனர்.