தென்னிந்திய அளவிலான சிலம்பப் போட்டியில் அசத்திய மேட்டுப்பாளையம் மாணவர்கள் – ராவணன் சிலம்பம் அகாடமிக்கு பெருமை.

கொடைக்கானலில் நடைபெற்ற தென்னிந்திய அளவிலான சிலம்பப் போட்டியில் பங்கேற்ற மேட்டுப்பாளையத்தைச் சேர்ந்த ராவணன் சிலம்பம் அகாடமி மாணவர்கள் பல்வேறு பிரிவுகளில் வெற்றி பெற்று, ஏராளமான பரிசுகளையும் பதக்கங்களையும் வென்று நகருக்கு பெருமை சேர்த்துள்ளனர்.

தமிழர்களின் பாரம்பரிய தற்காப்புக் கலையான சிலம்பத்தை இளம் தலைமுறையினரிடம் கொண்டு செல்லும் நோக்கில் செயல்பட்டு வரும் ராவணன் சிலம்பம் அகாடமி, பல ஆண்டுகளாக மாணவர்களுக்கு முறையான பயிற்சிகளை வழங்கி வருகிறது. இதன் பயிற்சியாளர்களின் வழிகாட்டுதலின் கீழ் பயிற்சி பெற்ற மாணவர்கள், கொடைக்கானலில் நடைபெற்ற தென்னிந்திய அளவிலான போட்டியில் ஒற்றை சிலம்பம், இரட்டை சிலம்பம், வாள் வீச்சு, மான்கொம்பு உள்ளிட்ட பல்வேறு பிரிவுகளில் சிறப்பான திறமைகளை வெளிப்படுத்தி வெற்றிகளைப் பெற்றனர்.மேலும், அகாடமியைச் சேர்ந்த வீரர்கள் தொடர்ந்து ஒரு மணி நேரம் சிலம்பம் சுற்றி சாதனை படைத்து, கின்னஸ் உலக சாதனைப் புத்தகத்தில் இடம்பிடித்திருப்பது குறிப்பிடத்தக்கது. இந்த சாதனை, சிலம்பக் கலையின் மீதான அவர்களின் அர்ப்பணிப்பு மற்றும் கடின உழைப்புக்கு கிடைத்த அங்கீகாரமாக கருதப்படுகிறது.

ராவணன் சிலம்பம் அகாடமியில் தற்போது ஒற்றை சிலம்பம், இரட்டை சிலம்பம், வாள் வீச்சு, மான்கொம்பு, தற்காப்புக் கலை நுட்பங்கள் உள்ளிட்ட பல்வேறு பயிற்சிகள் முறையாக கற்பிக்கப்பட்டு வருகின்றன. சிறுவர்கள் முதல் இளைஞர்கள் வரை ஏராளமானோர் இதில் பயிற்சி பெற்று வருகின்றனர்.போட்டியில் வெற்றி பெற்ற மாணவர்களையும், அவர்களைப் பயிற்றுவித்த பயிற்சியாளர்களையும் மேட்டுப்பாளையம் பகுதி பொதுமக்கள், சமூக ஆர்வலர்கள் மற்றும் விளையாட்டு ஆர்வலர்கள் பாராட்டி வருகின்றனர். பாரம்பரிய தமிழர் வீரக் கலையான சிலம்பத்தை தேசிய மற்றும் சர்வதேச அளவில் எடுத்துச் செல்லும் வகையில் ராவணன் சிலம்பம் அகாடமி தொடர்ந்து செயல்பட்டு வருவது குறிப்பிடத்தக்கது.